खरीप हंगाम 2025-26 साठी ई-पीक पाहणी (E-Pik Pahani) सुरू झाली असली तरी, तांत्रिक अडचणींमुळे शेतकऱ्यांना नोंदणी करताना त्रास सहन करावा लागत आहे. सध्या ॲपवर जास्त प्रमाणात लोड येत असल्याने सर्व्हर संथ गतीने चालत आहे. परिणामी नोंदणीसाठी अपेक्षेपेक्षा जास्त वेळ लागत असून, काही शेतकऱ्यांना ॲप बंद पडल्यासारखे वाटते.
ई-पीक पाहणी ॲपमध्ये डिजिटल क्रॉप सर्व्हे (Digital Crop Survey) आणि जीओ-टॅगिंग सुविधा असल्याने प्रत्यक्ष शेतात जाऊन पिकांचे फोटो काढणे, अक्षांश-रेखांश मिळवणे आणि ते अपलोड करणे आवश्यक असते. मात्र, फोटो अपलोड होण्यास जास्त वेळ लागणे, ॲप पुन्हा सुरू होणे किंवा लोकेशन न मिळणे अशा समस्या सध्या वारंवार दिसून येत आहेत.
शासनाचा सल्ला – “रात्री रजिस्ट्रेशन करा”
शासनाने सर्व्हरवरील ताण कमी करण्यासाठी शेतकऱ्यांना रात्री चांगल्या नेटवर्क असलेल्या ठिकाणी (गावात किंवा शहरात) असताना रजिस्ट्रेशन पूर्ण करण्याचा सल्ला दिला आहे.
यासाठी शेतकऱ्यांनी –
- सकाळी शेतात जाऊन ऑफलाईन पद्धतीने पीक पाहणी पूर्ण करावी.
- रात्री स्थिर नेटवर्कमध्ये मोबाईल ॲपवरील ‘अपलोड’ बटण वापरून डेटा सेव्ह करावा.
असा केल्यास –
- सर्व्हर लोड कमी होईल
- वेळेचा त्रास टळेल
- पिकाची नोंदणी सहज पूर्ण होईल
नोंदणीची मुदत व ॲपचे नवे व्हर्जन
शासनाने 1 ऑगस्ट ते 14 सप्टेंबर या 45 दिवसांच्या कालावधीत पीक पाहणी पूर्ण करण्याची मुदत दिली आहे. या हंगामासाठी गुगल प्ले स्टोअरवर ई-पीक पाहणी ॲपचे 4.0.0 हे नवे व्हर्जन उपलब्ध करून देण्यात आले आहे. मात्र, ॲप वापरताना तांत्रिक अडचणी आणि सर्व्हरच्या धीम्या गतीमुळे अनेक शेतकरी अजूनही त्रस्त आहेत.
शासनाचे आवाहन आहे की, शेतकऱ्यांनी वेळेत नोंदणी पूर्ण करून सरकारी योजनेचा लाभ घ्यावा आणि शेवटच्या क्षणी होणारा ताण टाळावा.